MahaDBT योजना ; या शेतकऱ्यांचे अर्ज होनार बाद, पुर्वसंमतीही रद्द ; ‘महाडीबीडी फार्मर स्कीम’ अंतर्गत राबवल्या जाणाऱ्या मुख्यमंत्री शाश्वत कृषी सिंचन योजनेतील वैयक्तिक शेततळ्याच्या लाभार्थ्यांसाठी कृषी विभागाने एक अत्यंत महत्त्वाचे परिपत्रक जारी केले आहे. ही योजना शेतकऱ्यांना ठिबक सिंचन, तुषार सिंचन, शेततळे आणि अस्तरीकरण यांसारख्या बाबींसाठी ८०% पर्यंत अनुदान प्रदान करते. २०२५-२६ या वर्षासाठी, राज्यातील २६,९७२ लाभार्थ्यांची निवड करून त्यांना वैयक्तिक शेततळ्यासाठी पूर्वसंमती देण्यात आली आहे, यासाठी १०० कोटी रुपयांची भरीव तरतूद करण्यात आलेली आहे.
मागील काळात अतिवृष्टी आणि पावसामुळे अनेक शेतकऱ्यांना वेळेत शेततळ्याची कामे पूर्ण करता आली नव्हती. ही अडचण लक्षात घेऊन कृषी विभागाने जून २०२५ मध्ये अर्ज बाद न करण्याचे आणि कागदपत्रे अपलोड करण्यासाठी मुदतवाढ देण्याचे निर्देश दिले होते. तथापि, पावसाळा संपूनही, निवड झालेल्या अनेक शेतकऱ्यांनी अद्याप आवश्यक कागदपत्रे अपलोड केलेली नाहीत किंवा पूर्वसंमती मिळाल्यानंतरही शेततळ्याचे खोदकाम सुरू केलेले नाही. या दिरंगाईमुळे उपलब्ध निधीपैकी केवळ ३ ते ४ टक्के निधीचाच वापर झाला आहे, ज्यामुळे पात्र असूनही अनेक इच्छुक लाभार्थी अनुदानाच्या प्रतीक्षेत आहेत.
