हवामान अपडेट: मध्य महाराष्ट्र, मराठवाडा आणि विदर्भात थंडीचा कडाका कायम!
राज्यात थंडीचा कडाका कायम असून, मध्य महाराष्ट्र, मराठवाडा, आणि विदर्भासह बहुतांश भागांत थंडीची लाट पसरली आहे. हवामान विभागाने दिलेल्या अंदाजानुसार, पुढील दोन दिवस ही थंडीची लाट कायम राहील. राज्यात बहुतांश ठिकाणी तापमानात लक्षणीय घट झाली आहे. थंडीच्या या तीव्रतेमुळे जनजीवनावर परिणाम झाला असून, नागरिकांनी स्वतःला उबदार ठेवण्यासाठी अनेक उपाययोजना सुरू केल्या आहेत.
राज्यात अनेक जिल्ह्यांमध्ये थंडीचा जोर दिसून आला आहे. यामध्ये सोलापूर, पुणे, नाशिक, धुळे, नंदुरबार, जळगाव, छत्रपती संभाजी नगर, जालना, बीड, यवतमाळ, वर्धा, नागपूर, आणि गोंदिया या जिल्ह्यांमध्ये थंडीची लाट होती. राज्यात सर्वात कमी तापमान धुळे येथे ७ अंश सेल्सियस इतके नोंदवण्यात आले. याव्यतिरिक्त, निफाड आणि मोहडी येथेही पारा ७.३ अंश सेल्सियस पर्यंत खाली उतरल्याची नोंद झाली.
हवामान विभागाने पुढील दोन दिवसांसाठी काही भागांमध्ये थंडीची लाट कायम राहण्याचा अंदाज व्यक्त केला आहे. त्यानुसार, सोलापूर, पुणे, नाशिक, धुळे, नंदुरबार, जळगाव, छत्रपती संभाजी नगर, जालना, बीड, लातूर, नांदेड, परभणी, हिंगोली, आणि गोंदिया या जिल्ह्यांमध्ये थंडीची लाट अनुभवण्याची शक्यता आहे. तसेच, येत्या शुक्रवारी जळगाव, नाशिक, छत्रपती संभाजी नगर, परभणी आणि हिंगोली या भागांतही थंडीची लाट कायम राहण्याची शक्यता हवामान विभागाने वर्तवली आहे.
